ముఖ్యమంత్రి రేవంత్ రెడ్డికి వేములవాడ జాతర ఆహ్వానం

 

హైదరాబాద్ (Surya news): మహాశివరాత్రి పర్వదినాన్ని పురస్కరించుకుని రాజన్న సిరిసిల్ల జిల్లాలోని ప్రముఖ పుణ్యక్షేత్రం వేములవాడ శ్రీ రాజరాజేశ్వర స్వామివారి జాతర మహోత్సవానికి రావాల్సిందిగా ముఖ్యమంత్రి రేవంత్ రెడ్డిని ఆలయ యంత్రాంగం ఆహ్వానించింది. మంగళవారం ముఖ్యమంత్రిని ఆయన నివాసంలో కలిసిన ప్రతినిధి బృందం అధికారికంగా ఆహ్వాన పత్రికను అందజేసింది.

​మంత్రి కొండా సురేఖ, దేవాదాయ శాఖ కమిషనర్ హరీష్, ఆలయ కార్యనిర్వాహక అధికారి (EO) రమాదేవి ముఖ్యమంత్రిని మర్యాదపూర్వకంగా కలిసి జాతర విశేషాలను వివరించారు. ఈ సందర్భంగా వేములవాడ ఆలయ అర్చకులు ముఖ్యమంత్రికి వేద ఆశీర్వచనాలు అందించి, స్వామివారి ప్రసాదాన్ని అందజేశారు.

​రాష్ట్రవ్యాప్తంగా లక్షలాది మంది భక్తులు తరలివచ్చే ఈ మహాశివరాత్రి జాతరను అత్యంత వైభవంగా నిర్వహించేందుకు ప్రభుత్వం ఇప్పటికే అన్ని ఏర్పాట్లు చేస్తోంది. వేములవాడ క్షేత్ర అభివృద్ధిపై ప్రత్యేక దృష్టి సారించిన ప్రభుత్వం, భక్తులకు ఎలాంటి ఇబ్బందులు కలగకుండా తగిన చర్యలు తీసుకోవాలని అధికారులను ఆదేశించింది.